عمران خان کی گرفتاری:اسلام آباد پولیس نے 2 اور مقدمات درج کرلئے
اسلام آباد پولیس نے پاکستان تحریک انصاف کے چیئرمین اور سابق وزیراعظم عمران خان کی گرفتاری کے بعد توڑ پھوڑ کرنے پر 2 مقدمات درج کرلیے ہیں۔ گزشتہ روز اسلام آباد ہائیکورٹ کی حدود میں موجود بائیو میٹرک کے دفتر سے القادرٹرسٹ کیس میں گرفتار کیا گیا۔ گرفتاری کے بعد پاکستان تحریک انصاف کے کارکن مشتعل ہو کر سڑکوں پر نکل آئے اور ملک کے مختلف شہروں میں احتجاجی مظاہرے کیے ۔ملکی تاریخ میں پہلی بار راولپنڈی میں واقع پاک فوج کے ہیڈکوارٹر (جی ایچ کیو) اور لاہور میں کورکمانڈر ہاؤس میں بھی گھس کر توڑ پھوڑ بھی کی گئی۔اب اسلام آباد پولیس نے توڑ پھوڑ پر 2 مقدمات درج کرلیے ہیں، مقدمات تھانہ کھنہ اور تھانہ لوہی بھیر میں درج کیے گئے ہیں۔مقدمات میں کار سرکار میں مداخلت اور دفعہ 144 کی خلاف ورزی کرنا شامل ہیں۔مقدمات میں پی ٹی آئی کی مقامی قیادت اور درجنوں نامعلوم کارکن ملزم نامزد کیے گئے ہیں۔