امریکی صدر ڈونلڈ ٹرمپ کی دھمکیوں اور دباؤ کے باوجود فرانس اور کینیڈا نے گرین لینڈ میں اپنے قونصل خانے باضابطہ طور پر کھول دیے اور ڈنمارک کے ساتھ عملی حمایت کا اعلان کیا ہے۔ عالمی خبر رساں ادارے کے مطابق فرانس اور کینیڈا نے گرین لینڈ کے دارالحکومت نونُوک میں قونصل خانے قائم کر دیے ہیں۔ دونوں ممالک نے واضح کیا کہ اس اقدام کا مقصد کسی تیسرے ملک کی مخالفت نہیں بلکہ ڈنمارک کے ساتھ تعاون اور دوستی کا اظہار ہے۔ یہ پیش رفت ایسے وقت میں سامنے آئی ہے جب صدر ٹرمپ نے دوسری بار گرین لینڈ پر ملکیت کا دعویٰ کیا ہے۔ فرانسیسی سفیر کرسٹوپ پیرِسوٹ اور فرانسیسی قونصل جنرل ژاں نویل پوئریئر نے میڈیا سے گفتگو میں کہا کہ فرانس کا قونصل خانہ گرین لینڈ اور ڈنمارک کے ساتھ یکجہتی کی علامت ہے اور اس سے امریکا کو کوئی پیغام دینا مقصود نہیں۔ انہوں نے کہا کہ مشکل وقت میں ساتھ کھڑا ہونا مضبوط تعلقات کی بنیاد بنتا ہے۔ اسی روز کینیڈا کی وزیر خارجہ انیتا آنند اور گورنر جنرل مریم سائمن نے کینیڈین قونصل خانے کا افتتاح کیا اور قومی پرچم لہرایا۔ گلوبل افیئرز کینیڈا کے مطابق کینیڈا اور گرین لینڈ کے درمیان دنیا کی طویل ترین سمندری سرحد کے ساتھ آرکٹک خطے میں صدیوں پر محیط تعلقات موجود ہیں۔ واضح رہے کہ کینیڈا نے دسمبر دو ہزار چوبیس جبکہ فرانس نے جون دو ہزار پچیس میں گرین لینڈ میں قونصل خانے کھولنے کا اعلان کیا تھا۔