وزیراعلیٰ پنجاب مریم نواز نے صوبے بھر میں انفراسٹرکچر اور ڈیزائن سٹینڈرائزیشن کا بڑا فیصلہ کر لیا۔ ان کی زیر صدارت ہونے والے خصوصی اجلاس میں متعلقہ حکام نے انفراسٹرکچر اور ذیزائن سٹینڈرڈائزیشن کے مختلف پہلوؤں پر تفصیلی بریفنگ دی۔ وزیراعلیٰ نے پہلی مرتبہ “ون پنجاب ون سٹینڈر” پالیسی کی منظوری دیتے ہوئے صوبے میں یکساں ترقی اور نظم و ضبط کو یقینی بنانے کی ہدایت کی۔ فیصلے کے تحت صوبہ بھر میں یکساں روڈز، گرین بیلٹس، سائن بورڈز اور فٹ پاتھ تعمیر کیے جائیں گے جبکہ سکولوں، ہسپتالوں، بس اسٹاپس اور سرکاری عمارتوں کے ڈیزائن بھی یکساں کیے جائیں گے۔ اجلاس میں انفراسٹرکچر کی بہتری اور اربن ڈیزائن کو مؤثر بنانے کے لیے خودمختار اتھارٹی کے قیام پر بھی غور کیا گیا۔ سڑکوں کے کنارے قائم چھوٹی دکانوں کے کیبن کے یکساں ڈیزائن مقرر کرنے کی تجویز بھی زیر بحث آئی۔ وزیراعلیٰ مریم نواز شریف نے سٹینڈرائزڈ ڈیزائن مینول تیار کرنے کا حکم دیتے ہوئے کہا کہ پنجاب اب ایک رنگ اور ایک معیار سے پہچانا جائے گا۔ ان کا کہنا تھا کہ ڈسپلن ہی ترقی کا اصل حسن ہے اور لاہور سے راجن پور تک ہر گلی اور شاہراہ کو خوبصورت اور منظم بنایا جائے گا۔ وزیراعلیٰ کے مطابق انفراسٹرکچر اور روڈ فرنیچر کے یکساں ڈیزائن سے نہ صرف شہری سہولیات بہتر ہوں گی بلکہ صوبے کا جمالیاتی حسن بھی نمایاں ہوگا۔