امریکا کے صدر ڈونلڈ ٹرمپ نے اپنے دوسرے دورِ صدارت کے پہلے اسٹیٹ آف دی یونین خطاب میں ایک بار پھر پاکستان اور بھارت کے درمیان ممکنہ جوہری جنگ رکوانے کا دعویٰ کرتے ہوئے اس کا کریڈٹ لیا۔کانگریس سے خطاب کے دوران صدر ٹرمپ نے داخلی امور کے ساتھ ساتھ عالمی تنازعات پر بھی بات کی۔ انہوں نے امیگریشن اصلاحات، امریکی معیشت کی بہتری اور منشیات فروش کارٹیلز کے خلاف اقدامات کو اپنی حکومت کی اہم کامیابیاں قرار دیا، جبکہ عالمی سطح پر مختلف جنگیں رکوانے کا دعویٰ بھی کیا۔ صدر ٹرمپ کا کہنا تھا کہ انہوں نے مجموعی طور پر 8 جنگیں ختم کرائیں۔ ان کے مطابق کمبوڈیا اور تھائی لینڈ کے درمیان کشیدگی کم کرائی، اسرائیل اور ایران کے درمیان تنازع کو روکا، کانگو اور روانڈا میں جنگ بندی ممکن بنائی اور پاکستان و بھارت کے درمیان نیوکلیئر جنگ کو ٹالا۔انہوں نے دعویٰ کیا کہ پاکستان کے وزیراعظم نے ان سے کہا کہ انہوں نے 35 ملین افراد کی جان بچائی۔ ٹرمپ کے مطابق جنوبی ایشیا میں کشیدگی انتہائی خطرناک سطح تک پہنچ چکی تھی اور ان کی سفارتی مداخلت سے حالات قابو میں آئے۔ غزہ کی صورتحال پر بات کرتے ہوئے امریکی صدر نے کہا کہ ان کی کوششوں سے جنگ بندی ممکن ہوئی اور معاہدے کے تحت تمام زندہ یرغمالیوں کو واپس لایا گیا۔ ان کا کہنا تھا کہ 28 یرغمالی افراد کی لاشیں بھی برآمد کی گئیں اور اس عمل میں حماس اور اسرائیل دونوں نے تعاون کیا۔صدر ٹرمپ نے روس اور یوکرین کے درمیان جاری جنگ کے خاتمے کے لیے بھی سفارتی کوششیں جاری رکھنے کے عزم کا اظہار کیا اور کہا کہ امریکا عالمی سطح پر امن کے قیام کے لیے متحرک کردار ادا کرتا رہے گا۔