فرانسیسی طیارہ بردار بحری جہاز شارل ڈیگول بحیرہ روم پہنچ گیا۔ فرانسیسی طیارہ بردار بحری جہاز شارل ڈیگول، جسے فرانس نے اپنے شہریوں اور اتحادیوں کو موجودہ حالات کے پیش نظر مشرق وسطیٰ بھیجا تھا آبنائے جبرالٹر عبور کرنے کے بعد بحیرہ روم میں داخل ہوگیا ہے۔ بین الاقوامی خبر رساں ادارے کی رپورٹ کے مطابق یہ فرانسیسی طیارہ بردار بحری جہاز شمالی یورپ میں نیٹو کے ایک مشن کا حصہ تھا اور فرانسیسی صدر میکرون نے اسے مشرق وسطیٰ بھیجنے کا حکم دے دیا تھا۔ انہوں نے مشرقی بحیرہ روم میں بڑے فوجی سازوسامان بشمول طیارہ بردار جہاز شارل ڈیگول بھیجنے کا اعلان کیا کیونکہ فرانس کو اپنی، اپنے شہریوں، اپنے اڈوں اور خطے میں اپنے اتحادیوں کی سلامتی کے لیے اقدامات کرنے چاہئیں۔ فرانسیسی صدر نے مزید کہا کہ فرانس اس خطے میں جنگ نہیں لڑ رہا۔ یہ فرانسیسی مردوں، عورتوں اور اپنے اتحادیوں کی حفاظت کر رہا ہے۔