کراچی میں عیدالفطر کے موقع پر موسم سے متعلق اہم پیشگوئی سامنے آگئی ہے، جس کے مطابق شہر میں عید کے پہلے روز بارش کا امکان ظاہر کیا گیا ہے۔محکمہ موسمیات کے مطابق کراچی میں آج موسم زیادہ تر صاف اور دھوپ برقرار رہے گی، تاہم کل سے شہر میں دوبارہ بارش کا سلسلہ شروع ہونے کا امکان ہے۔ عیدالفطر کے پہلے روز بالخصوص مضافاتی علاقوں میں ہلکی بارش متوقع ہے، جس سے موسم خوشگوار ہو جائے گا۔ اعداد و شمار کے مطابق شہر کا کم سے کم درجہ حرارت 19 ڈگری سینٹی گریڈ ریکارڈ کیا گیا، جبکہ موجودہ درجہ حرارت 21 ڈگری سینٹی گریڈ ہے۔ دن کے دوران گرمی کی شدت 24 ڈگری تک محسوس کی جا رہی ہے اور زیادہ سے زیادہ درجہ حرارت 27 ڈگری سینٹی گریڈ تک جانے کا امکان ہے۔ 18 مارچ کی رات شہر میں طوفانی ہواؤں اور موسلادھار بارش نے موسم کا رخ یکسر بدل دیا تھا۔ تیز ہواؤں کے باعث مختلف حادثات میں 20 افراد جاں بحق جبکہ متعدد زخمی ہوئے۔ تقریباً 97 کلومیٹر فی گھنٹہ کی رفتار سے چلنے والی ہواؤں نے گھروں کی چھتیں اڑا دیں، درخت گر گئے اور کئی گاڑیوں کو بھی نقصان پہنچا۔