ایرانی میزائل حملے نے جنوبی اسرائیل کے شہر عراد میں بڑے پیمانے پر تباہی مچا دی، حملے کے نتیجے میں 6 افراد ہلاک جبکہ 100 سے زائد زخمی ہو گئے۔ اسرائیلی میڈیا کے مطابق حملے میں کم از کم 20 عمارتوں کو شدید نقصان پہنچا، جس کے باعث علاقے میں خوف و ہراس پھیل گیا۔ حملے کے وقت شہریوں کو بروقت الرٹ جاری نہیں کیا جا سکا، متعدد افراد گھروں سے باہر موجود تھے جس کے باعث جانی نقصان میں اضافہ ہوا۔ عراد کے اسپتال میں ہنگامی حالت نافذ کر دی گئی ہے جبکہ زخمیوں کو فوری طبی امداد فراہم کی جا رہی ہے۔اسرائیلی ایمرجنسی سروس کے مطابق امدادی ٹیمیں جائے وقوعہ پر موجود ہیں اور متاثرین کو ریسکیو کیا جا رہا ہے۔ حکام کا کہنا ہے کہ زخمیوں میں ایک 5 سالہ بچی کی حالت تشویشناک ہے جبکہ 11 افراد کی حالت درمیانی نوعیت کی ہے، دیگر کو معمولی زخم آئے ہیں۔فائر فائٹرز حکام کے مطابق حملے کے باعث متعدد عمارتوں میں آگ بھی بھڑک اٹھی جس پر قابو پانے کی کوششیں جاری ہیں۔ اس سے قبل ایران کی جانب سے دیمونا پر بھی میزائل حملہ کیا گیا تھا جس میں درجنوں افراد زخمی ہوئے تھے، جس کے بعد خطے میں کشیدگی مزید شدت اختیار کر گئی ہے۔