بھارتی دارالحکومت نئی دہلی کی خصوصی عدالت نے مقبوضہ کشمیر کی تنظیم دختران ملت کی سربراہ آسیہ اندرابی کو عمر قید کی سزا سنا دی جبکہ ان کی ساتھیوں فہمیدہ صوفی اور ناہیدہ نسرین کو تیس تیس سال قید کا حکم دیا گیا ہے۔ عدالت نے یہ سزائیں غیر قانونی سرگرمیوں کی روک تھام کے قانون یو اے پی اے اور تعزیرات ہند کی مختلف دفعات کے تحت سنائیں۔ استغاثہ کی جانب سے آسیہ اندرابی پر الزام عائد کیا گیا کہ انہوں نے مبینہ طور پر تقاریر کے ذریعے بھارت کے خلاف سرگرمیوں کو ہوا دی، جس پر عدالت نے فیصلہ سنایا۔عدالتی کارروائی کے دوران بھارتی تحقیقاتی ادارے نے آسیہ اندرابی کے لیے عمر قید کی سزا کی استدعا کی تھی جسے عدالت نے منظور کر لیا۔ ایڈیشنل سیشن جج نے دلائل مکمل ہونے کے بعد فیصلہ سنایا۔انسانی حقوق کی مختلف تنظیموں نے اس فیصلے پر شدید ردعمل دیتے ہوئے اسے سیاسی بنیادوں پر قائم مقدمہ قرار دیا ہے۔ ناقدین کے مطابق یہ اقدام مقبوضہ جموں و کشمیر میں حریت رہنماؤں کے خلاف جاری دباؤ کا حصہ ہے۔آسیہ اندرابی سن دو ہزار سترہ سے تہاڑ جیل میں قید ہیں جبکہ ان کے شوہر بھی طویل عرصے سے مختلف مقدمات میں زیر حراست رہے ہیں جس پر عالمی سطح پر تشویش کا اظہار کیا جاتا رہا ہے۔