اسلام آباد (نمایندہ نوائے وقت) مدینہ الحجاج اسلام آباد (المعروف حاجی کیمپ) کے ڈائریکٹر حج، قاضی سمیع الرحمن سے ایک خصوصی انٹرویو کیا گیا جس میں انہوں نے حج انتظامات کے حوالے سے اہم تفصیلات سے آگاہ کیا۔ ڈائریکٹر حج قاضی سمیع الرحمن کے مطابق 9 تاریخ سے ویکسینیشن کا عمل شروع کیا جا رہا ہے۔ حاجی کیمپ میں بینک، ایئرلائن، ہسپتال اور دیگر سہولیات کے اسٹالز قائم کر دیے گئے ہیں، جبکہ سکاؤٹس بھی حجاج کرام کی رہنمائی کے لیے ہر وقت موجود ہوں گے۔ انہوں نے بتایا کہ ہر حاجی کو اسلام آباد سے جدہ اور مدینہ منورہ روانگی سے قبل ٹکٹ، لاکٹ (شناختی کارڈ) اور دیگر ضروری دستاویزات کی مکمل تفصیل حاجی کیمپ سے فراہم کی جائے گی۔ قاضی سمیع الرحمن نے مزید کہا کہ حجاج کرام کی تربیت کا عمل رمضان المبارک سے قبل مکمل کر لیا گیا ہے، تاہم حاجی کیمپ میں آمد کے بعد بھی تربیتی سیشنز کا سلسلہ آخری وقت تک جاری رہے گا تاکہ کسی قسم کی دشواری پیش نہ آئے۔ انہوں نے سعودی حکومت کی جانب سے جاری کردہ طبی ہدایات پر سختی سے عمل کرنے کی تاکید کرتے ہوئے کہا کہ جو عازمین ان ہدایات پر پورا نہیں اتریں گے، سعودی حکام کو انہیں ڈیپورٹ کرنے کا اختیار حاصل ہے۔ انہوں نے حجاج کرام سے اپیل کی کہ وہ تمام ہدایات پر مکمل عمل کریں تاکہ ان کا سفر حج محفوظ اور آسان بنایا جا سکے۔