سینئر صوبائی وزیر شرجیل انعام میمن نے سندھ حکومت کی نئی گندم خریداری پالیسی کا اعلان کر دیا ، جس کا مقصد کاشتکاروں کے مفادات کا تحفظ اور خوراک کی سیکیورٹی کو یقینی بنانا ہے۔سینئر وزیر کے مطابق حکومت نے ایک ملین میٹرک ٹن گندم خریدنے کا فیصلہ کیا ہے تاکہ آٹے کی قیمتوں کو قابو میں رکھا جا سکے۔ یکم اپریل سے صوبے بھر کے 109 مراکز پر گندم کی خریداری کا آغاز ہوگا جبکہ فی من امدادی قیمت 3 ہزار 500 روپے مقرر کی گئی ہے۔ شرجیل میمن کا کہنا تھا کہ گندم صرف رجسٹرڈ ہاری کارڈ ہولڈرز سے خریدی جائے گی، جس سے 3 لاکھ 30 ہزار سے زائد کاشتکار براہِ راست مستفید ہوں گے اور مڈل مین کا کردار ختم ہوگا۔ اس سال حکومت باردانہ فراہم نہیں کرے گی، کاشتکار اپنے بیگ لائیں گے تاہم ہر بیگ کے عوض 60 روپے کی رقم براہِ راست سندھ بینک کے ذریعے ان کے اکاؤنٹس میں منتقل کی جائے گی۔سینئر وزیر کے مطابق یہ نیا نظام شفاف، مؤثر اور جعلسازی سے محفوظ ہوگا جبکہ حکومت کے پاس پہلے سے 2 لاکھ ٹن گندم کا ذخیرہ موجود ہے۔ سندھ میں سالانہ 4 اعشاریہ 3 ملین ٹن گندم پیدا ہوتی ہے اور یہ پالیسی خاص طور پر چھوٹے کاشتکاروں کی مالی معاونت، خوراک کے تحفظ اور عوام کو سستا آٹا فراہم کرنے کیلئے مرتب کی گئی ہے۔