پنجاب میں سماجی بہبود کے شعبے کو مزید مؤثر بنانے کے لیے صوبائی وزیر سوشل ویلفیئر سہیل شوکت بٹ اور پارلیمانی سیکرٹری جعفر علی ہوچہ کے درمیان اہم ملاقات ہوئی، جس میں محکمانہ امور اور جاری فلاحی منصوبوں پر تفصیلی تبادلہ خیال کیا گیا۔ اس موقع پر وزیراعلیٰ پنجاب مریم نواز کی قیادت میں دھی رانی پروگرام، ہمت کارڈ اور اسسٹیو ڈیوائسز کے دائرہ کار کو بڑھانے سمیت مختلف اقدامات پر غور کیا گیا، جبکہ فلاحی منصوبوں میں شفافیت برقرار رکھنے کے عزم کا اعادہ بھی کیا گیا۔ صوبائی وزیر کا کہنا تھا کہ صنعت زاروں کی اپ گریڈیشن کا عمل شروع کر دیا گیا ہے تاکہ خواتین کو معاشی طور پر مستحکم بنایا جا سکے، جبکہ دھی رانی پروگرام اور ہمت کارڈ کے ذریعے ہزاروں افراد مستفید ہو رہے ہیں اور خصوصی افراد کو ان کی ضرورت کے مطابق معاون آلات فراہم کیے جا رہے ہیں، صوبائی وزیر کا مزید کہنا تھا کہ اس کے ساتھ ساتھ فلاحی اداروں کے نظام کو بہتر بنانے اور وہاں مقیم افراد کو مزید سہولیات دینے کے اقدامات بھی جاری ہیں۔