وزیر اعظم کے مشیر رانا ثنا اللہ نے دعویٰ کیا ہے کہ وزیر اعلیٰ پنجاب مریم نواز آنے والے دنوں میں ایسا پلان بنا رہی ہیں کہ بائیک والوں کی پیٹرول سے جان ہی چھوٹ جائے گی۔ انہوں نے کہا کہ حافظ نعیم الرحمان، نیتن یاہو کے خلاف احتجاج کریں ان حالات میں حکومت کے خلاف احتجاج نہیں بنتا۔ ن لیگی رہنما نے کہا کہ جو افرا تفری اور لوگوں کو گمراہ کررہے ہیں ان کے لیے کوئی گنجائش نہیں، اس وقت پاکستان میں مکمل یکجہتی کا ماحول ہونا چاہیے، پاکستان کے ساتھ کھڑے ہوں اور حکومت کے ہاتھ مضبوط کریں۔ رانا ثنا کا کہنا ہے کہ سب کو سیاسی اور عسکری قیادت کے ساتھ کھڑا ہونا چاہیے، ذاتی مفاد کے بجائے ملکی مفاد کو ترجیح دیں، وزیراعظم اور فیلڈ مارشل کی کوششوں سے تیل سپلائی میں رکاوٹ نہیں آئی۔ مشیر وزیراعظم نے کہا کہ ریاست کے مفاد کے خلاف سرگرمیاں کریں گے تو قانون کا سامنا کرنا پڑے گا، آپ اس مرحلے میں قومی دھارے میں شامل ہوجائیں۔ انہوں نے کہا کہ امید ہے آنے والے کچھ دنوں میں جنگ بند ہوجائے، آبنائے ہرمز سے اب تک دو جہاز آسکے ہیں، امید کی جانی چاہیے مزید پیٹرول کی قیمتوں میں اضافہ نہ ہو۔