سیز فائر کے بعد اسرائیل میں ہنگامی حالات کی صورتحال ختم ہونے کے بعد اسرائیلی عدالت نے نیتن یاہو کے خلاف بدعنوانی کے مقدمے کی کارروائی دوبارہ شروع کرنے کا اعلان کردیا۔ اسرائیلی وزیراعظم نیتن یاہو کے خلاف 2020 سے جاری کرپشن کیس کی سماعت اتوار سے دوبارہ شروع ہوگی جو گزشتہ عرصے میں جنگی صورتحال کے باعث عارضی طور پر روک دی گئی تھی۔ مقدمے کی کارروائی اتوار سے بدھ تک جاری رہے گی۔ اسرائیلی وزیراعظم نیتن یاہو پر اقتدارکے دوران فرد جرم عائد کی گئی۔۔ ایران جنگ کی آڑ میں نیتن یاہو نے تمام عدالتی کارروائیاں معطل کردی تھیں۔ اسرائیلی حکام کے مطابق مقدمات کی سماعت جنگ کے باعث عارضی طور پر معطل کی گئی تھیں تاہم جنگ بندی کے بعد ملک میں معمولات زندگی بتدریج بحال ہورہے ہیں، جس کے تحت عدالتی کارروائیاں بھی دوبارہ شروع کی جارہی ہیں۔ غیرملکی میڈیا کے مطابق اسرائیلی وزیراعظم نیتن یاہو پر رشوت، فراڈ اور سرکاری اختیارات کے مبینہ ناجائز استعمال جیسے سنگین الزامات عائد ہیں۔ دوسری جانب امریکی صدر ڈونلڈ ٹرمپ ماضی میں نیتن یاہو کے لیے صدارتی معافی کی حمایت کا اظہار کرچکے ہیں۔عدالتی کارروائی کے دوبارہ آغاز کو اسرائیلی سیاست میں ایک اہم پیشرفت کے طور پر دیکھا جارہا ہے، جس کے اثرات آئندہ سیاسی صورتحال پر بھی پڑسکتے ہیں۔