اقوام متحدہ کی سلامتی کونسل کے اجلاس میں پاکستان نے جمہوریہ کانگو کے مشرقی علاقوں میں بگڑتی صورتحال پر شدید تشویش کا اظہار کرتے ہوئے فوری جنگ بندی اور مؤثر سفارتکاری کی ضرورت پر زور دیا ہے۔ نیویارک میں اجلاس سے خطاب کرتے ہوئے پاکستان کے مستقل مندوب عاصم افتخار احمد نے کہا کہ جاری تشدد، بڑھتا انسانی بحران اور بے گھر افراد کی تعداد میں اضافہ اس بات کا تقاضا کرتا ہے کہ امن کے قیام کے لیے فوری اقدامات کیے جائیں۔ سلامتی کونسل کی قرارداد دو ہزار سات سو تہتر پر مکمل عملدرآمد پر زور دیتے ہوئے کہا کہ پائیدار جنگ بندی ہی خطے میں دیرپا استحکام کی بنیاد بن سکتی ہے۔ پاکستان نے عالمی اور علاقائی سفارتی کوششوں کا خیرمقدم کیا جن میں افریقی یونین کی ثالثی، واشنگٹن پراسیس اور دوحہ فریم ورک شامل ہیں، اور کہا کہ یہ اقدامات اعتماد سازی اور سیاسی حل کی راہ ہموار کر سکتے ہیں۔پاکستان نے مونوسکو کے کردار کی حمایت کا اعادہ کرتے ہوئے کہا کہ مناسب حالات میں جنگ بندی کے نفاذ میں اس کا کردار اہم ہوگا۔ عاصم افتخار احمد نے نشاندہی کی کہ مشرقی کانگو میں غیر قانونی کان کنی اور وسائل کی اسمگلنگ بدامنی کی بڑی وجوہات ہیں، جن کے تدارک کے لیے علاقائی تعاون اور شفاف نظام ضروری ہے۔ سفارتی کوششوں میں تیزی کے باوجود زمینی صورتحال میں واضح بہتری نہ آنا بحران کی پیچیدگی کو ظاہر کرتا ہے۔ پاکستان نے کانگو کی خودمختاری اور علاقائی سالمیت کی مکمل حمایت کرتے ہوئے عالمی برادری پر زور دیا کہ وہ مشترکہ اقدامات کے ذریعے پائیدار امن کو یقینی بنائے۔