لاہور کے علاقے ملتان روڈ پر نجی کالج کی طالبات کی بس پر فائرنگ کرنے والا مرکزی ملزم انجام کو پہنچ گیا۔ سی سی ڈی اقبال ٹاؤن کا کہنا ہےکہ ملزم عمر خالد کو گرفتار کرنے کیلئے کارروائی کی گئی تو ملزم نے فائرنگ شروع کر دی۔ پولیس کے مطابق دونوں جانب سے تقریباً آٹھ منٹ تک فائرنگ کا تبادلہ جاری رہا، ملزم کی فائرنگ سے نقاش نامی پولیس اہلکارزخمی ہوگیا پولیس کا کہنا ہے کہ ملزم عمر خالد نے 28 نومبر 2023 کو تفریحی دورے پر جاتی طالبات کی بس پر فائرنگ کی تھی جس کے نتیجے میں عائشہ نامی طالبہ کے سر پر گولی لگی اور وہ مفلوج ہو گئی، جبکہ دو طالبات زخمی بھی ہوئیں۔ حکام کے مطابق ملزم جیل سے رہا ہونے کے بعد منشیات فروشی سمیت دیگر سنگین جرائم میں بھی ملوث رہا۔ کارروائی کے دوران ملزم کے چار ساتھی موٹر سائیکلوں پر فرار ہونے میں کامیاب ہو گئے جن کی تلاش جاری ہے۔ پولیس کا کہنا ہے کہ دو طرفہ فائرنگ کے نتیجے میں ملزم عمر خالد ہلاک ہو گیا، لاش کو پوسٹمارٹم کیلئے منتقل کر دیا گیا جبکہ فرار ہونے والے ملزمان کی گرفتاری کیلئے سرچ آپریشن جاری ہے