ایمرجنسی ہیلپ لائن 15 پر ذہنی دباؤ کے شکار افراد کیلئے مفت "کونسلنگ سروس" کامیابی سے جاری لاہور، 23 اپریل 2026ء: وزیراعلیٰ پنجاب مریم نواز شریف کی ہدایات پر پنجاب سیف سٹیز اتھارٹی کی جانب سے ایمرجنسی ہیلپ لائن 15 پر ذہنی دباؤ کے شکار افراد کیلئے مفت "کونسلنگ سروس" کامیابی سے جاری ہے، جس کے ذریعے شہریوں کو فوری، مؤثر اور پیشہ ورانہ نفسیاتی مدد فراہم کی جا رہی ہے۔ ترجمان پنجاب سیف سٹیز اتھارٹی کے مطابق جنوری سے اپریل 2026 تک ہیلپ لائن 15 پر 276 سے زائد ایسی کالز موصول ہوئیں جن میں شہریوں نے ذہنی دباؤ اور خودکشی مرتکب کرنے کے خیالات کا اظہار کیا۔ ان تمام کیسز میں سیف سٹی کی جانب سے فوری کارروائی کرتے ہوئے متاثرہ افراد کو ماہر اور سپیشلائزڈ سائیکالوجسٹس سے کانفرنس کال کے ذریعے منسلک کیا گیا۔ سیف سٹی میں تعینات ماہرینِ نفسیات نے بروقت رہنمائی اور پیشہ ورانہ کونسلنگ کے ذریعے ان افراد کو انتہائی اقدام سے باز رکھنے میں اہم کردار ادا کیا۔ ترجمان کے مطابق اس سروس کے ذریعے نہ صرف قیمتی جانوں کو بچایا جا رہا ہے بلکہ متاثرہ شہریوں کو نئی امید دے کر زندگی کی طرف واپس لایا جا رہا ہے۔ ترجمان سیف سٹی نے مزید بتایا کہ شہری کسی بھی ذہنی دباؤ، پریشانی، ناامیدی یا خودکشی کے خیالات کی صورت میں فوری طور پر ایمرجنسی ہیلپ لائن 15 ڈائل کریں اور 7 دبائیں تاکہ ماہرِ نفسیات سے فوری رہنمائی حاصل کی جا سکے۔ شہری "GenZ App" کے ذریعے بھی 24/7 چیٹ کی سہولت کے تحت ماہرینِ نفسیات سے رابطہ کر سکتے ہیں۔ اس سروس کے دوران کال کرنے والے افراد کی شناخت اور معلومات کو مکمل طور پر صیغہ راز میں رکھا جاتا ہے۔ ترجمان نے مزید کہا کہ ذہنی دباؤ یا اضطراب کا شکار افراد سیف سٹی کی اس مفت کونسلنگ سروس سے بھرپور استفادہ کریں، کیونکہ بروقت مدد زندگی بچا سکتی ہے۔پنجاب سیف سٹیز اتھارٹی جدید ٹیکنالوجی کے استعمال کے ذریعے شہریوں کی حفاظت، فلاح و بہبود اور ذہنی صحت کے فروغ کیلئے مسلسل مثبت اقدامات کر رہی ہے۔