امیر جماعت اسلامی حافظ نعیم الرحمان نے پیٹرولیم مصنوعات کی قیمتوں میں حالیہ اضافے اور بھاری لیوی ٹیکس کو محنت کشوں کا معاشی قتل قرار دے دیا ۔ کہتے ہیں مزدوروں کو بنیادی حقوق دینے کی بجائے ان کے منہ سے نوالہ چھینا جا رہا ہے ۔ملک کی 8 کروڑ لیبر فورس میں سے ساڑھے 6 کروڑ محنت کشوں کو رجسٹرڈ تک نہیں کیا گیا، جو ریاست کی ناکامی کا منہ بولتا ثبوت ہے۔ امیر جماعت اسلامی حافظ نعیم الرحمان نے یومِ مئی کے موقع پر منصورہ میں مزدوروں سے خطاب کرتے ہوئے کہا یوم مئی تقریبات کی حد تک محدود ہو کر رہ گیا ہے، پاکستان کی 25 کروڑ آبادی میں سے 8 کروڑ لوگ محنت کش ہیں، مگر ان کی محنت کا پھل صرف مخصوص طبقہ، بیوروکریسی اور جاگیردار کھا رہے ہیں۔ امیر جماعت اسلامی نے حکومت سے مطالبہ کیا کہ مزدوروں کو خیرات یا بے نظیر انکم سپورٹ جیسی سکیموں کے بجائے ان کا اصل حق دیا جائے،انہوں نے حکمران خاندانوں کو آڑے ہاتھوں لیتے ہوئے سوال کیا کہ زرداری اور شریف خاندان اپنی شوگر ملوں میں کام کرنے والے مزدوروں کو بھی حق نہیں دیتے عوام کو کیا دیں گے ۔ حافظ نعیم الرحمان نے پیٹرولیم مصنوعات کی قیمتوں میں اضافے پر برہمی کا اظہار کرتے ہوئے کہا کہ حکومت لیوی کی مد میں 500 ارب روپے وصول کر رہی ہے ۔ جبکہ موٹر سائیکل چلانے والا غریب محنت کش ایک لیٹر پٹرول پر 125 روپے ٹیکس دے رہا ہے ۔