اسرائیل اور لبنان کے درمیان جنگ بندی کے باوجود جنوبی لبنان پر اسرائیلی حملوں کا سلسلہ جاری ہے جس کے نتیجے میں مزید انیس افراد جاں بحق اور دو درجن کے قریب زخمی ہو گئے۔ عالمی خبر رساں اداروں کے مطابق تازہ فضائی اور ڈرون حملے جنوبی لبنان کے قصبوں سکسکیہ، نباتیہ، سعدیات اور میفدون میں کیے گئے جہاں خواتین اور بچوں سمیت متعدد شہری نشانہ بنے۔رپورٹس کے مطابق قصبہ سکسکیہ پر اسرائیلی فضائی حملے میں کم از کم سات افراد جان سے گئے جن میں ایک بچی بھی شامل ہے جبکہ پندرہ افراد زخمی ہوئے، زخمیوں میں تین بچے بھی شامل ہیں۔ اسی طرح نباتیہ میں ایک شامی شہری اور اس کی بارہ سالہ بیٹی ڈرون حملے میں مارے گئے۔ اسپتال ذرائع کے مطابق متعدد زخمیوں کی حالت تشویشناک ہے جس کے باعث ہلاکتوں میں اضافے کا خدشہ ظاہر کیا جا رہا ہے۔ لبنان کی حکومت نے اسرائیل پر جنگ بندی معاہدے کی مسلسل خلاف ورزی کا الزام عائد کرتے ہوئے عالمی برادری سے فوری مداخلت کا مطالبہ کیا ہے۔ حزب اللہ کا کہنا ہے کہ اسرائیلی حملوں میں معصوم شہریوں کو نشانہ بنایا جا رہا ہے جبکہ تنظیم نے دعویٰ کیا ہے کہ اس نے جوابی کارروائی میں شمالی اسرائیل میں فوجی اہداف پر ڈرون اور راکٹ حملے کیے ہیں۔واضح رہے کہ اپریل میں امریکی ثالثی کے تحت اسرائیل اور لبنان کے درمیان جنگ بندی طے پائی تھی تاہم اس کے باوجود سرحدی علاقوں میں کشیدگی برقرار ہے۔ لبنان کی وزارت صحت کے مطابق مارچ سے جاری اسرائیلی حملوں میں اب تک ستائیس سو سے زائد افراد جاں بحق جبکہ لاکھوں شہری بے گھر ہو چکے ہیں۔