لاہورسمیت پنجاب کے متعدد اضلاع میں تیز ہواؤں اور گرج چمک کے ساتھ بارش کا سلسلہ جاری ہے اور گرمی کی شدت میں کمی سے موسم خوشگوار ہوگیا ہے۔

عارفوالا میں تیز ہواؤں کے باعث متعدد فیڈر ٹرپ کرگئے جس کے نتیجے میں شہر بھر میں اندھیرے کا راج ہوگیا۔

چنیوٹ اور گردونواح میں بھی کالی گھٹاؤں کا راج ہے اور ٹھنڈی ہواؤں کے ساتھ بارش کا سلسلہ جاری ہے۔ شہریوں کو بارش کے باعث عید کی نماز پڑھنے میں دشواری کا سامنا کرنا پڑا۔ بارش کے باعث عید گاہ ، اسلامیہ کالج سمیت دیگر مقامات پر عید کی نماز نہ پڑھائی جاسکی اور مسجدوں میں رش رہا۔ گوجرانوالہ اور گردنواح میں بھی موسلادھار بارش جاری ہے۔
لاہور میں طوفانی بارش کے باعث کمشنر کیپٹن محمد عثمان نے تمام محکموں کو چوکس رہنے کے احکامات جاری کر دیے۔ محکمہ موسمیات نے پیش گوئی کی کہ بارش کا سلسلہ مزید دو روز تک جاری رہے گا۔