وزیراعظم نے عید سے قبل وفاقی کابینہ کا اہم اجلاس طلب کرلیا
اسلام آباد (نیوزڈیسک) وزیراعظم عمران خان نے عید الفطر سے قبل وفاقی کابینہ کا اہم اجلاس طلب کرلیا، اجلاس میں اپوزیشن کے ممکنہ احتجاج اور ملک کی سیاسی ومعاشی صورتحال کا جائزہ لیا جائے گا، ایمنسٹی اسکیم پرعملدرآمد اور پٹرولیم مصنوعات کی قیمتوں کا بھی جائزہ لیا جائےگا۔ میڈیا رپورٹس کے مطابق وزیراعظم عمران خان نےعید سے قبل

وفاقی کابینہ کا اجلاس طلب کرلیا ہے۔ وفاقی کابینہ کا اجلاس پیر3 جون کوصبح ساڑھے گیارہ بجے وزیراعظم آفس میں ہوگا۔ وفاقی کابینہ کے اجلاس کا 12 نکاتی ایجنڈا بھی جاری کردیا گیا۔ وفاقی کابینہ کے اجلاس میں اپوزیشن کے ممکنہ احتجاج اور ملک کی سیاسی ومعاشی صورتحال کا جائزہ لے گی۔ اسی طرح اجلاس میں وزیراعظم اسلامی سربراہی کانفرنس سے متعلق کابینہ کواعتماد میں لیں گے۔ بتایا گیا ہے کہ اجلاس میں اثاثہ جات ظاہرکرنے کے اعلان پرعملدرآمد اور پٹرولیم مصنوعات کی قیمتوں کا جائزہ لیا جائےگا۔ کابینہ اجلاس کے ایجنڈے کے تحت وفاقی کابینہ حج پالیسی 2019 کی منظوری دے گی۔ وزارت داخلہ اورخارجہ کابینہ کونئی ویزا پالیسی پربریفنگ دیں گے۔ بچوں کے حقوق کا قومی کمیشن تشکیل دینے کی منظوری بھی ایجنڈے میں شامل ہے۔ انسداد دہشتگردی عدالت کے اسپیشل جج کی تقرری کی منظوری دی جائے گی۔ انشورنس ٹریبونل ملتان، لاہورکے ممبر، چیئرپرسن کی تقرری کی منظوری بھی ایجنڈے میں شامل ہیں۔ اسی طرح کابینہ عتیق احمد کو وفاقی تعلیمی بورڈ کا چیئرمین مقررکرنے کی منظوری بھی دے گی۔ وفاقی کابینہ نجی ایئرلائن کے لائسنس کی

منسوخی کا جائزہ بھی لے گی۔ واضح رہے وزیراعظم عمران خان سعودی عرب کے تین روزہ دورے پر ہیں۔ وزیر اعظم اسلامی سبراہی کانفرنس میں شرکت کیلئے سعودی عرب گئے ہیں۔