پاکستان شوبز انڈسٹری کے معروف اداکار اعجاز اسلم نے مداحوں کو بُری خبر سنا دی۔

فوٹو اینڈ ویڈیو شیئرنگ پلیٹ فارم انسٹاگرام پر اداکار نے پوسٹ شیئر کی ہے اور مداحوں کو آگاہ کیا ہے کہ ان کی والدہ انتقال کر گئی ہیں۔

اداکار نے اپنی والدہ کی یادگار تصویر شیئر کی ہے جس میں انہیں اسپتال کے سفید لباس میں ملبوس دیکھا جا سکتا ہے، جس سے اندازہ ہوتا ہے کہ ان کی والدہ انتقال سے قبل بیمار تھیں۔

انہوں نے کیپشن میں لکھا ہے کہ میری پیاری والدہ اس جہاں کو چھوڑ کر بہتر جہاں میں چلی گئیں۔

اداکار نے مزید لکھا ہے کہ والدہ کی مہربانی، محبت اور حکمت ہمیشہ میرے دل میں رہے گی، جیسے ان کے جانے کا غم ہمارے قلب میں تازہ رہے گا۔

اعجاز اسلم نے اپنے چاہنے والوں سے دعاؤں کی درخواست کرتے ہوئے یہ بھی لکھا ہے کہ میں آپ سب سے درخواست کرتا ہوں کہ انہیں اپنی قیمتی دعاؤں میں یاد رکھیں۔

سوشل میڈیا پر اداکار کے مداحوں، انڈسٹری سے وابستہ ان کے ساتھی فنکاروں نے ان کے غم میں برابر کے شریک ہونے کا اظہار کرتے ہوئے ان کی والدہ کی مغفرت کے لیے دعا کی ہے۔