بانی پی ٹی آئی کی اہلیہ بشریٰ بی بی کی توشہ خانہ ٹو کیس میں ضمانت کے معاملے میں روبکار جاری نہ ہوسکی۔

سینئر اسپیشل جج سینٹرل شاہ رخ ارجمند کی عدم دستیابی اور اسپیشل جج سینٹرل نمبر ٹو ہمایوں دلاور کی رخصت کے باعث روبکار جاری نہ ہوسکی۔

پی ٹی آئی وکلا مچلکے جمع کروانے کیلئے عدالتوں کے چکر لگاتے رہے اور عدالتی وقت ختم ہوگیا۔

بشریٰ بی بی کے وکلا خالد یوسف اور خدیجہ صدیقی نے ایڈمنسٹریٹو جج جواد عباس کی عدالت سے بھی رجوع کیا تھا۔ ایڈمنسٹریٹو جج جواد عباس پہلے ہی کمرہ عدالت سے روانہ ہوچکے تھے۔

بشریٰ بی بی کے وکلاء جوڈیشل کمپلیکس سے ضلع کچہری پہنچے تھے۔ بشریٰ بی بی کے وکلا نے ضلع کچہری میں سیشن جج ویسٹ کی عدالت سے بھی روبکار جاری کرنے کی استدعا کی۔

عدالتی عملے کا کہنا ہے کہ اسپیشل جج سینٹرل کے ڈیوٹی ججز کی لسٹ میں سیشن جج ویسٹ کا نام شامل نہیں ہے۔