جنوبی پنجاب میں ریسکیو آپریشن کے دوران کشتیاں الٹنے کے واقعات میں اموات کی تعداد 30 ہوگئی۔جلال پورپیروالا،لیاقت پور،منچن آباد،علی پور اور اوچ شریف میں کشتی الٹنے کے دس کے لگ بھگ واقعات رونما ہوئے،جاں بحق افراد میں بچے،خواتین اور بزرگوں کی اکثریت ہے،حادثات میں آٹھ سے زائد افراد تاحال لاپتہ ہیں جن کی تلاش کے لئے ریسکیو آپریشن جاری ہے۔ ڈی جی ریسکیو سیکرٹری ایمرجنسی سروسز ڈاکٹررضوان کا کہنا ہیکہ تین لاکھ بیس ہزار لوگوں کو جب نکالیں اورتین دریائوں میں بیک وقت سیلاب ہوں،تو اس طرح کے حادثات کے نمبر بہت کم ہیں،جتنی بڑی آفت ہے،اس میں چھوٹے موٹے حادثات ہو جاتے ہیں ۔صوبائی وزیرتعمیرات ملک صہیب احمد برتھ نے کہا کہ جب کشتی آتی ہے تو سیلاب میں پھنسے لوگ خوشی کے مارے ایک دم بیٹھنے کی کوشش کرتے ہیں،کسی کی بات نہیں مانتے۔