سربراہ جمعیت علما اسلام مولانا فضل الرحمان نے کہا ہے کہ قومی سطح پر اعتماد ناگزیر ہے، ادارے عوام کے فیصلوں کو قبول کریں۔ شہر قائد میں امن مارچ کے شرکا سے خطاب کرتے ہوئے مولانا فضل الرحمان کا کہنا تھا کہ پورے خطےمیں پاکستان معاشی لحاظ سے نیچے کی طرف جا رہا ہے، باقی سارے ممالک معاشی لحاظ سے اوپر جا رہے ہیں۔ انہوں نے کہا کہ چاروں صوبوں میں میثاق پاکستان کا آئین ہے،آئین کی جب چاہے شکل بدل دیتے ہیں، ضیاالحق کےمارشل لا سے جمہوریت کی جدوجہد کررہا ہوں۔ سربراہ جے یو آئی نے کہا کہ اگرسیاست دان استقامت کا مظاہرہ کریں تو ملک آگے بڑھ سکتا ہے، ادارے عوام کے فیصلوں کو قبول کریں، قومی سطح پرباہمی اعتماد پیدا کرنے کی ضرورت ہے۔ مولانا فضل الرحمان کا مزید کہنا تھا کہ اختلاف رائے اپنی جگہ لیکن ملکی سلامتی کےمعاملے پر ہم سب ایک ہے، اگر امن نہیں ہوگا تو ملکی معیشت بہتر نہیں ہو سکتی۔