دنیا کی سب سے بڑی کرپٹو کرنسی بِٹ کوائن (Bitcoin) نے ایک بار پھر سرمایہ کاروں کو حیران کر دیا ہے۔ اتوار کو عالمی وقت کے مطابق صبح 5 بج کر 12 منٹ پر بِٹ کوائن کی قیمت 2.7 فیصد اضافے کے ساتھ 1 لاکھ 25 ہزار 245 امریکی ڈالر تک جا پہنچی — جو اس کی تاریخ کی نئی بلند ترین سطح ہے۔ یہ نئی سطح اگست کے وسط میں قائم ہونے والے 1 لاکھ 24 ہزار 480 ڈالر کے سابقہ ریکارڈ کو پیچھے چھوڑ گئی۔ مالیاتی تجزیہ کاروں کے مطابق یہ اضافہ امریکی حکومت کی نئی کرپٹو پالیسی میں نرمی، بڑے ادارہ جاتی سرمایہ کاروں کی دلچسپی اور اسٹاک مارکیٹ کی مثبت کارکردگی کا نتیجہ ہے۔ بین الاقوامی خبر رساں ادارے کے مطابق، امریکی صدر ڈونلڈ ٹرمپ کی انتظامیہ نے کرپٹو کرنسی کے لیے نرم ضوابط کی حمایت کا عندیہ دیا ہے، جس کے بعد سرمایہ کاروں نے مارکیٹ میں تیزی سے واپسی شروع کر دی ہے۔ اعداد و شمار کے مطابق، جمعے کے روز بِٹ کوائن لگاتار آٹھویں دن بڑھتا ہوا بند ہوا، جو گزشتہ سال کے بعد پہلی بار مسلسل اتنی طویل مدت تک اوپر گیا ہے۔ ماہرین کا کہنا ہے کہ اس تیزی کی ایک بڑی وجہ کرپٹو سے منسلک ایکسچینج ٹریڈڈ فنڈز (ETFs) میں سرمایہ کاری کا بڑھتا ہوا رجحان بھی ہے، جس نے مارکیٹ میں نئے سرمایہ کو متحرک کیا ہے۔