افغانستان کے شہر مزار شریف سمیت دیگر شہروں میں زلزلے کے جھٹکے محسوس کئے گئے، مختلف واقعات میں 12 افرادجاں بحق اور 150 زخمی ہوگئے، مکانات کو بھی شدید نقصان پہنچا۔ حکام نے اموات میں اضافے کا خدشہ ظاہر کردیا۔مزار شریف میں زلزلے کے وقت شہری خوفزدہ ہو کر گھروں سے باہر نکل آئے، لوگ گھروں سے نکل کر کھلے مقامات کی طرف دوڑنے لگے کیونکہ انہیں خدشہ تھا کہ ان کے مکانات گر سکتے ہیں،متاثرہ علاقوں میں امددی کارروائیاں جاری ہیں ۔ امریکی جیولوجیکل سروے کے مطابق زلزلے کی شدت 6.3 اور گہرائی 28کلو میٹر ریکارڈ کی گئی جبکہ زلزلے کا مرکز صوبہ سمنگان کے ضلع خلم سے تقریبا 22 کلو میٹر جنوب مغرب میں تھا۔ زلزلے کے جھٹکے ترکمانستان، تاجکستان، ازبکستان اور ایران میں بھی محسوس کئے گئے۔واضح رہے کہ رواں سال 31 اگست کو افغانستان میں 6.0 شدت کے زلزلے میں 2 ہزار سے زائد افراد ہلاک ہوئے تھے جبکہ 2023 میں 6.3 شدت کے زلزلے اور آفٹر شاکس کے نتیجے میں کم از کم 4 ہزار اموات ہوئی تھیں۔