وزیراعلیٰ پنجاب مریم نواز نے راولپنڈی میں الیکٹرو بس فیز ٹو کی افتتاحی تقریب سے خطاب کرتے ہوئے صوبے بھر کے لیے متعدد بڑے منصوبوں اور اصلاحات کا اعلان کیا۔ تقریب سے خطاب میں بتایا گیا کہ راولپنڈی میں 30 ارب روپے کی لاگت سے 25 کلومیٹر طویل سگنل فری کوریڈور، 9 انڈر پاسز اور 3 فلائی اوورز پر مشتمل منصوبہ اگلے سال مکمل ہو جائے گا جس سے روزانہ دو لاکھ افراد کو فائدہ پہنچے گا۔ شہر میں صفائی، سڑکوں کی تعمیر و بحالی اور ہسپتالوں کی بہتری کے ساتھ ساتھ رجانہ سے بھکر تک تھل ایکسپریس وے، 100 ارب روپے سے دیہات میں نیا ڈرینیج و سیوریج سسٹم، اور محکمہ ٹرانسپورٹ کے تحت 1100 گرین بسوں کی فراہمی بھی منصوبے کا حصہ ہے۔ الیکٹرو بس سروس میں خواتین، بزرگ، خصوصی افراد اور طلبہ کے لیے مفت سفر کی سہولت رکھی گئی ہے جبکہ بسوں میں وائی فائی، موبائل چارجنگ پورٹس، علیحدہ خواتین کمپارٹمنٹ اور ہراسگی سے بچاؤ کے لیے CCTV مانیٹرنگ شامل ہے۔ صحت کے شعبے میں لاہور کینسر ہسپتال کی تکمیل کے بعد راولپنڈی اور ڈی جی خان میں نئے کینسر ہسپتال قائم کیے جائیں گے، جبکہ کلینک آن وہیل، کارڈیالوجی سینٹرز اور مفت ادویات کی فراہمی جیسے اقدامات جاری ہیں۔ ایک لاکھ گھروں کی تعمیر، اسکولوں میں سہولیات کی فراہمی، 80 ہزار طلبہ کے لیے اسکالرشپ، انسولین اور ادویات کی ہوم ڈیلیوری، سموگ میں خاطر خواہ کمی، قبضہ مافیا کے خلاف کارروائی، 15 لاکھ خاندانوں کے لیے 3000 روپے ماہانہ امداد، 85 ارب روپے کے آسان کاروبار قرضے، اور زرعی اصلاحات بھی خطاب کا حصہ رہے۔ وزیراعلیٰ نے کہا کہ پنجاب میں ترقیاتی کام تیزی سے جاری ہیں، سیکیورٹی بہتر ہوئی ہے اور خواتین کے لیے محفوظ سفر و ماحول کی فراہمی حکومت کی اولین ترجیح ہے۔ آخر میں انہوں نے کہا کہ پنجاب میں ہر شہری برابر کا حق رکھتا ہے، اور صوبہ ترقی کرے گا تو لوگوں کی زندگی بہتر ہوگی۔ مریم نواز نے خطاب کا اختتام اس عزم کے ساتھ کیا کہ "پنجاب میں ترقی ہوگی تو خوشحالی ہوگی