بھارت نے اپنے دفاعی بجٹ میں نمایاں اضافہ کرنے کا فیصلہ کیا ہے، جو خطے میں عدم توازن کا باعث بن سکتا ہے۔ مالی سال 2026-27 کے لیے بھارت کے دفاعی اخراجات میں 20 سے 25 فیصد تک اضافہ متوقع ہے، جو پاکستان کے مقابلے میں کئی گنا زیادہ ہے۔ بھارت نے امریکہ، روس، فرانس، اسرائیل اور اسپین سے جدید فوجی سازوسامان خریدا ہے، جس میں ہیلی کاپٹر، طیارے، میزائلز اور دیگر ہتھیار شامل ہیں۔ پاکستان کی مسلح افواج محدود وسائل کے باوجود اعلیٰ پیشہ ورانہ صلاحیتوں کے ساتھ ملک کے دفاع کو مضبوطی سے یقینی بنا رہی ہیں۔ پاکستان کا دفاعی بجٹ مجموعی قومی پیداوار کا صرف 1.97 فیصد ہے، جبکہ بھارت کا بجٹ 6.81 کھرب بھارتی روپے ہے، جس کا بڑا حصہ نئے ہتھیاروں کی خریداری کے لیے مختص کیا گیا ہے۔ دفاعی ماہرین کے مطابق بھارت کی بڑھتی ہوئی عسکری طاقت خطے میں کشیدگی اور عدم استحکام کا سبب بن رہی ہے۔ پاکستان حکومت نے بھی اپنی مسلح افواج کو جدید بنانے اور دفاعی چیلنجز سے نمٹنے کے لیے اقدامات جاری رکھے ہیں۔