پاکستان انٹرنیشنل ایئر لائنز (PIA) بالآخر نجی شعبے میں فروخت ہو گئی، جہاں عارف حبیب گروپ نے 135 ارب روپے کی کامیاب بولی دے کر قومی ایئرلائن حاصل کر لی۔ یہ نیلامی حکومت کی نجکاری پالیسی کا ایک اہم سنگِ میل قرار دی جا رہی ہے، تاہم ماہرین اور اوورسیز نمائندوں کا کہنا ہے کہ اگر پاکستان اوورسیز بینک کے قیام کو بروقت ترجیح دی جاتی تو آج PIA اوورسیز پاکستانیوں کی ملکیت ہو سکتی تھی۔ نجکاری کے عمل کے دوران تمام کنسورشیم پاکستانی کمپنیوں پر مشتمل تھے۔ حکومت کی جانب سے کم از کم قیمت 100 ارب روپے مقرر کی گئی تھی۔ عارف حبیب گروپ نے ابتدائی طور پر 115 ارب روپے کی بولی دی جبکہ لکی سیمنٹ گروپ نے 101 ارب روپے کی پیشکش کی۔ بعد ازاں نصف گھنٹے تک بولیوں کا سخت مقابلہ جاری رہا، جس میں لکی سیمنٹ 121 اور پھر 128 ارب تک پہنچی، جبکہ عارف حبیب گروپ نے 126 اور آخرکار 135 ارب روپے کی فیصلہ کن بولی دے کر کامیابی حاصل کی۔ مالیاتی حلقوں نے اس شفاف اور مسابقتی عمل کو سراہا ہے۔مسلم لیگ (ن) مدینہ منورہ کے صدر جاوید اقبال بٹ نے نوائے وقت سے گفتگو کرتے ہوئے کہا کہ اگر حکومت پہلے پاکستان اوورسیز بینک کے قیام کو ترجیح دیتی تو آج PIA اوورسیز پاکستانیوں کی ملکیت میں ہوتی۔ انہوں نے کہا کہ دنیا بھر میں مقیم پاکستانی سالانہ تقریباً 38 ارب ڈالر وطن بھیجتے ہیں، اور اگر صرف 25 ارب ڈالر بھی ایک اوورسیز بینک میں جمع ہو جائیں تو اس کے منافع سے نہ صرف PIA جیسے ادارے خریدے جا سکتے ہیں بلکہ اوورسیز کمیونٹی کے مسائل بھی مستقل بنیادوں پر حل کیے جا سکتے ہیں۔ جاوید اقبال بٹ نے بتایا کہ انہوں نے اس تجویز کے حوالے سے اس وقت کے وزیر خزانہ اور موجودہ نائب وزیراعظم و وزیر خارجہ محمد اسحاق ڈار کو تحریری طور پر آگاہ کیا تھا، جنہوں نے اسٹیٹ بینک سے مشاورت اور تعاون کی یقین دہانی کرائی۔ اس ضمن میں اوورسیز کمیشن پنجاب کے وائس چیئرمین بیریسٹر امجد ملک سے بھی مشاورت کی گئی، جنہوں نے قانونی فریم ورک، لائسنسنگ اور بڑے پاکستانی سرمایہ کاروں کو بورڈ میں شامل کرنے کی تجاویز دیں۔ جاوید اقبال بٹ کا کہنا تھا کہ اگر پاکستان اوورسیز بینک قائم ہو جائے اور اس کے شیئرز اوورسیز پاکستانیوں کے لیے مخصوص ہوں تو نہ صرف انہیں ترجیحی بینکنگ سہولیات ملیں گی بلکہ کاروبار، صنعت اور تجارت میں بھی انقلاب آئے گا۔ ان کے مطابق اس بینک کا سالانہ منافع PIA کی 135 ارب روپے کی فروخت سے بھی کہیں زیادہ ہو سکتا ہے۔ انہوں نے بتایا کہ 25 نومبر 2025 کو بیریسٹر امجد ملک نے 20 رکنی اوورسیز وفد سے ملاقات میں اوورسیز بینک کے قیام کو ترجیحی بنیادوں پر آگے بڑھانے کا وعدہ کیا تھا، جبکہ 25 دسمبر کو اوورسیز پنجاب کمیشن میں ایک اہم اجلاس متوقع ہے، جس میں اس منصوبے کے عملی خدوخال طے کیے جائیں گے۔ ماہرین کے مطابق PIA کی نجکاری سے قومی خزانے کو فوری فائدہ حاصل ہوگا، تاہم پاکستان اوورسیز بینک جیسے منصوبے طویل المدتی بنیادوں پر معیشت کو مضبوط بنانے اور اوورسیز پاکستانیوں کو حقیقی شراکت دار بنانے میں کلیدی کردار ادا کر سکتے ہیں۔