سوئٹزرلینڈ کے مشہور سیاحتی مقام کرانس مونٹانا میں نیو ائیر نائٹ کے دوران ایک زوردار دھماکہ ہوا، جس کے نتیجے میں کم از کم 10 افراد ہلاک اور 10 زخمی ہو گئے۔ غیرملکی میڈیا رپورٹس کے مطابق دھماکہ لگژری ریزورٹ کے ایک اِسکی بار میں پیش آیا، جہاں اس وقت جشن منانے کے لیے بڑی تعداد میں لوگ موجود تھے۔ سوئس پولیس حکام نے ابتدائی طور پر دھماکے کی وجوہات اور ہلاک یا زخمی ہونے والوں کی صحیح تعداد کے بارے میں کچھ نہیں بتایا تھا، تاہم بعد ازاں بتایا گیا کہ زخمیوں کو فوری طور پر قریبی اسپتال منتقل کیا گیا ہے۔ پولیس کا کہنا ہے کہ دھماکہ بدھ اور جمعرات کی درمیانی شب تقریباً ایک بج کر 30 منٹ پر ہوا۔ یہ واقعہ نیو ائیر نائٹ کے دوران سیاحتی مقام پر پیش آنے والا خطرناک حادثہ قرار دیا جا رہا ہے، اور پولیس تحقیقات میں مصروف ہے تاکہ دھماکے کی وجوہات اور ذمہ داروں کا تعین کیا جا سکے۔